Njujork, London, (MINA-BUSINESS) – Cijena nafte zadržale su se u srijedu blizu 46 USD, balansirajući između znaka oporavka potražnje od posljedica pandemije koronavirusa i izvještaja koji su pokazali da su vodeći proizvođači u takvim okolnostima počeli povećavati ponudu.
Na londonskom tržištu cijena bila je skoro nepromijenjena u odnosu na prethodno zatvaranje i iznosila je 45,66 USD. Značajnijih promjena nije bilo ni na američkom tržištu gdje se barelom trgovalo po 42,85 USD, prenosi SEEbiz.
Tržišta je podstakao izvještaj Američkog instituta za naftu (API) koji je pokazao da su zalihe sirove nafte pale čak 6,4 miliona barela. Analitičari su očekivali daleko skromniji pad, od 1,9 miliona barela.
Američka vlada objaviće službeni izvještaj o zalihama tokom dana.
Potporu cijenama pružila su i istraživanja o industrijskim sektorima zemalja širom svijeta, koja su pokazala rast aktivnosti u avgustu, iako su šanse i dalje klimave.
“Tržišni igrači trenutno jašu na talasu optimizma, iako bi se on svakog trenutka mogao urušiti”, objasnio je tržištu naftni analitičar u PVM-u Stephen Brennock.
Vodeći proizvođači pomno prate oporavak industrije i kretanje potražnje kako bi prilagodili ograničenja proizvodnje, uvedena radi potpore cijenama i urušavanja potrošnje nafte nakon izbijanja pandemije i mjera njenog suzbijanja.
Od maja do avgusta Organizacija zemalja-izvoznica nafte (OPEC) i njeni saveznici smanjivali su proizvodnju 9,7 miliona barela dnevno, a od septembra do kraja godine ograničenja će biti ublažena na 7,7 miliona barela dnevno.
Reutersovo istraživanje objavljeno u utorak pokazalo je da je OPEC u avgustu povećao proizvodnju oko milijun barela dnevno.
Odvojeno je OPEC objavio da je cijena barela referentne korpe nafte njegovih članica u utorak iznosila 45,3 USD, te je pala 94 centa u odnosu na prethodni trgovinski dan.
